Num 17 | KSD | STEP | Ma ra Luluai i ga tata pire Moses dari:

Numbers 17

A buka kai Aron

1 Ma ra Luluai i ga tata pire Moses dari: 2 Una tata pire ra tarai Israel, ma una vatur vake ta ra umana lualua kai ra umana vuna tarai a vinun ma a ura buka, ure ra umana vuna tarai tikatikai; ma una tumu ra iang i tikatikai ta kana buka. 3 Ma una tumu ra iang i Aron ta ra buka ure ra vuna tarai Levi; ma tikatika na lualua na vuna tarai na vung tika na buka. 4 Ma una vung diat ta ra pal na varbarat ta ra luaina mata i ra tinata, aina dor varvarbarat tana. 5 Ma na dari: ra buka kai nina iau pilak pa ia na gol; ma ina vango ra umana tinata mukumuk kai ra tarai Israel kan iau, nina dia tata mukumuk me ure amur.

6 Ma Moses i ga tata pire ra tarai Israel, ma kadia lavur lualua dia ga tul tar ra vinun ma a ura buka tana, ure tikatika na lualua da kadia umana vuna tarai; ma ra buka kai Aron i ga ki livuan ta diat. 7 Ma Moses i ga vung ra umana buka ta ra luaina mata i ra Luluai ta ra pal ure ra tinata. 8 Ma i ga ningene, ma Moses i ga ruk ta ra pal ure ra tinata; ma gire, a buka kai Aron ure ra vuna tarai Levi i tar gol; ma i buk rikai, ma i pupu, ma i vuai ra vuaina. 9 Ma Moses i ga kap vaarike ra umana buka kan ra mata i ra Luluai pire ra tarai Israel par; ma dia ga gigira, ma tikatikai i ga vatur vake kana buka.

10 Ma ra Luluai i ga biti tai Moses: Una vung mule ra buka kai Aron ta ra luaina mata i ra tinata, ma da vung vake upi ra vakilang ure ra tarai na varpiam; upi una vamutue kadia lavur tinata mukumuk ure iau, upi koko diat a mat. 11 Moses i ga pait ia damana; i ga pait ia da ra Luluai i ga vartuluai pirana.

12 Ma ra tarai Israel dia ga tata pire Moses, ma dia ga biti: Ea, ave to na virua, ave tar rara, ave tar rara parika. 13 Nina i vana maravai, i vana maravai tadav ra pal kai ra Luluai, na mat; dave avet a virua par?